Управниот одбор на Фудбалската федерација на Македонија (ФФМ) денеска одлучи да ја прекине соработката со досегашниот селектор на А репрезентацијата на Македонија, Бошко Ѓуровски.
Бошко Ѓуровски како предводник на најдобрата македонска репрезентација на единаесет натпревари оствари две победи (Летонија и Луксембург), шест порази (Шпанија, Словачка, Украина, Белорусија, Камерун, Кина) и три нерешени резултати (Катар, Кина и Австралија) .
Одлуката за прекин на соработката е донесена поради очекувањата на ФФМ и притисокот на фудбалската јавност за подобри резултати во тековните квалификации за Европското првенство и подобар рејтинг на репрезентација.
„Како фудбалски работници знаеме дека резултатите се единственото мерило за успех и токму поради тоа безрезервно и максимално дававме поддршка и создававме услови за непречена работа на најдобрата селекција. И покрај тоа што Бошко Ѓуровски го споделуваше своето искуство и работеше со тренерите и играчите сепак, притисокот кога се работи за А репрезентативниот тим е преголем, посебно кога се соочуваме со негативна серија на резултати. Во фудбалскиот свет тоа резултира со неминовни промени, промени кои се надеваме дека ќе не водат кон успех и подобар рејтинг на А репрезентацијата“, се вели во соопштението.
Од ФФМ изразуваат уверување дека македонските навивачи ќе бидат со репрезентацијата во натпреварите кои следуваат.
