Холандскиот тенисер Робин Хасе го приреди најголемото изненадување во второто коло на Мастерс турнирот во Индијан Велс, откако во три сета го елиминира седмиот носител Станислас Вавринка.
За разлика од Швајцарецот кој го заврши турнирот, второто коло без многу проблеми го минаа Роџер Федерер и Рафаел Надал.
Вавринка кој од почетокот на сезоната ги освои турнирите во Ченај и Ротердам и играше во полуфиналето во Мелбурн, во Индијан Велс загуби од 104-от тенисер на АТП листата.
Хасе од почетокот на година до мечот со Вавринка имаше скор 0-6, а исто така немаше победа во шесте мечеви против Швајцарецот.
Сепак тоа не беше пречка Хасе да слави над фаворизираниот противник по еден час и 47 минути игра со 2:1 (6:3, 3:6, 6:3).
За разлика од Вавринка вторитот и третиот носител на турнирот, Федерер и Надал во второто коло експресно ги минаа своите противници. Федерр славеше над Аргентинецот Даниел Шварцман со 6:4, 6:2 за 64 минути игра, додека Надал со идентичен резултат славеше над ХоланѓанецотИгор Сајслинг за 73 минути.
Федерер во третото коло ќе игра против Андреас Сепи од кого загуби во третото коло на грен слем турнирот во Мелбурн, додека Надал за противник во наредната рунда ќе ги има Доналд Јанг.
