Водечките екипи во НБА лигата, Голден Стејт и Атланта забележаа победи над Торонто односно Орландо. Оклахома загуби од Портланд и покрај тоа што Расел Вестбрук трет натпревар во низа забележа ‘трипл дабл’.
Атланта славеше над Орландо со 95:88, Перо Антиќ мечот го заврши со три поени, пет скока и две асистенции. Пол Милсап ја предводеше Атланта со 20 поени, додека Џеф Тиг и Ал Хорфорд постигнаа по 17.
Црногорецот Никола Вучевиќ со 21 поен и 15 скока беше најекспонираниот играч на Орландо.
Голденс Стејт славеше во Торонто со 113:89. Лидерот во лигата до победата го предводеа Клеј Томпсон и Стеф Кари кои заедно искомбинираа 47 поени. Томпсон постигна 25, а Кари 22 поени.
Оклахома загуби од Портланд со 112:115, а Расел Вестбрук повторно запиша ‘трил дабл’. Бекот на Оклахома натпреварот го заврши со 40 поени, 13 скокови и 11 асистенции. Вестбрук е првиот играч по Леброн Џејмс во 2009 година кој запишал трипати двојно на три натпревари по ред.
Ламаркус Олдриџ и Демијан Лилард го предводеа Портланд со по 29 поени.
Денвер е во серија од пет порази откако загуби од Јута (82:104), Сан Антонио стави крај на низата од четири порази со триумфот над Сакраменто (107:96), додека Мемфис загуби од ЛА Клиперс (97:79).
Њујорк по едно продолжение славеше над Детроит (121:115), во регуларниот дел мечот заврши 95:95. Бостон го совлада Шарлот (106:98), Индијана славеше над Кливленд (93:86), Хјустон го победи Бруклин (102:98), Мајами минимално загуби во Њу Орлеанс (104:102), Чикаго без Дерик Роуз ја совлада Минесота (96:89), а Лејкерси триумфираа над Милвоки (101:93).
