Со наближувањето на саемот за електроника во Барселона шпекулациите за тоа што ќе достават водечките производители се зголемува.
Покрај премиерите на долгоочекуваните модели на „Samsung“ – „Galaxy S6“ и на „HTC“ – „HTC One“, очекувањата се поврзани со нова серија лаптопи од „Asus“, нова линија чипови од „Qualcomm“ и друго.
Меѓу технолошката заедница се шпекулира за уште еден уред кој може да биде претставен токму за време на овој саем – нешто помеѓу дигитална камера и паметен телефон, уред од компанијата „Lenovo“.
Моделот наречен со името „Lenovo Vibe Shot“, се очекува да е паметен телефон, чија најпрепознатлива карактеристика ќе е камерата. Уредот се очекува да е со алуминиумско тело во три бои, а камерата најверојатно ќе има 16 мегапиксели со сензор за подобри слики во недоволна средина и троен „флеш-блиц“. Таа ќе располага уште со инфрацрвен автофокус и оптичка стабилизација.
Во однос на техничките карактеристики на смартфонот, тој ќе има 5-инчен дисплеј со резолуција од 1080 пиксели, како и новиот осумјадрен чип на „Qualcomm“ – „Snapdragon 615“. Ќе има 3 GB RAM меморија и 32 GB внатрешна меморија која може да се проширува со слот картичка. Оперативниот систем ќе е најновата верзија на „Android“ – „Lollipop“.
