Селекторот на фудбалската репрезентација на Италија, Антонио Конте, ги демантираше шпекулациите дека по завршувањето на сезоната ќе стане тренер на Милан. Поранешниот тренер на Јувентус истакна дека негова желба е со Италија да игра на Европското првенство.
„Се најдов во една неочекувана ситуација и поради тоа морам да повторам какви се моите планови. Среќен сум што ја предводам италијанската репрезентација и сакам да го завршам она што го започнав. Се надевам дека со ова ставив крај на шпекулациите и дека сега ќе можам непречено да работам до 2016-та година“, изјави Конте пред италијанските новинари.
Италијанските медиуми започнаа да шпекулираат околу неговата иднина, откако тој за време на викендот изјави дека не би имал никаков проблем да го превземе Милан и покрај тоа што 14 години беше играч на Јувентус, клуб кој како тренер го предводеше до три титули во изминатите три години.