Македонскиот репрезентативец во маратонско пливање, Евгениј Поп Ацев, го освои четвртото место на маратонската трка во Аргентина со која започна новата натпреварувачка сезона.
Поп Ацев, 25-километарската трка од Вила Ургуиза до Парана, ја заврши зад победникот Марио Санцуло од Италија, неговиот сонародник Симоне Ерколи и Александар Стуџински од Германија.
Четвртото место му донесе 500 долари и седум бодови во редоследот на ФИНА во Гран при серијата.
На трката од Вила Ургуиза до Парана учествуваше и Александар Илиевски кој на целта стигна како 12-ти.
Оваа сезона во гран при серијата на ФИНА ќе се пливаат уште пет трки: на 25-ти април Канкун (Мексико), на 25-ти јули Сен Жан (Канада), на 1-ви август Магог (Канада), на 29-ти август Охрид (Македонија) и на 6-ти септември Капри-Наполи (Италија).