Шкотскиот фудбалер Дарен Флечер го напушти Манчестер Јунајтед, каде ги помина последните 20 години.
30-годишниот дефанзивен играч премина како слободен агент во Вест Бромвич во последните минути од зимскиот трансфер прозорец, кој се затвори на полноќ. Тој потпиша договор за две и пол години со опција за продолжување за уште дванаесет месеци.
„Се чувствувам одлично. Ова е еден фантастичен нов предизвик во мојата кариера. Ја поминав целата кариера во Јунајтед и не познавам ништо друго. Почувствував дека е вистинскиот момент да го направам овој чекор. Нема место за сентименталност. Доживував неверојатни моменти со Јунајтед, но сега сум играч на ВБА и со нетрпение очекувам да започнам“, рече Шкотланѓанецот во своето прво интервју како играч на ВБА.
Флечер беше дел од Манчестер Јунајтед од 1995-та година, кога од академијата на „црвените ѓаволи“ го привлекуваат од школата на шкотскиот Тајнкастел.
Во 2000-та година тој е на пат да стане најмладиот фудбалер, кој играл за првиот тим на рекордерот по титули на Англија, откако е вклучен во групата за последниот дуел од сезона 1999/2000. Правилата на Премиер лигата за договорите на играчи во школска возраст, сепак одложуваат неговото деби.
На 1-ви февруари 2001-ва година, Флечер го потпишува својот прв професионален договор. Во почетокот различни повреди му пречат да дојде до првиот тим. На 12-ти март 2003-та година, тој конечно го направи своето деби за „црвените ѓаволи“, почнувајќи како стартер на десното крило против Базел во Лигата на Шампионите.
Токму како десен играч започнува неговата кариера, но подоцна е преквалификува во играч од средниот ред.
Од сезоната 2003/2004 година, Флечер станува важен дел од составот на Сер Алекс Фергусон. Тој одигра 290 натпревари во првите осум полни сезони. Потоа, повторно различни повреди го ограничија времето на теренот и за последните четири години халфот одигра само 50 средби.
Флечер ги освои речиси сите можни трофеи со „црвените ѓаволи“. Тој беше дел од освојувањето на 14 трофеи во 12-те негови години во првиот тим – пет пати титулата во Премиер лигата, еднаш Купот на Англија, два пати Купот на лигата, четири пати Комјунити Шилд, како и Лигата на Шампионите и светското клубско првенство во 2008-ма година.