Бактериите можат да постојат и главно постојат на сите сапуни, но мала е веројатноста дека ќе се заразите од нив или дека ќе добиете некоја кожна инфекција, вели докторката Елејн Л. Ларсон од Универзитетот Колумбија. Сепак понекогаш треба да бидете внимателни.
„Само оние со послаб имунитет би требало да бидат внимателни и да ги употребуваат течните сапуни. Ако сте здрави, нема да имате проблеми да се одбраните од бактериите. Бактериите ги има на сапуните, но вие можете да направите неколку едноставни работи и нема да имате последици“, вели таа.
Сапунот треба да го измиете пред да го втриете на рацете, а кога ќе го одложите, треба да го ставите на суво место за да може да се исуши до следната употреба. Така влагата нема да привлече уште повеќе бактерии. Доколку сепак се сомневате во чистината, користете течен сапун.
„Ако сите во домот користите ист сапун за миење на рацете, не треба да бидете загрижени, бидејќи секојдневно меѓусебно разменувате многу микроорганизми. Јавните тоалети најчесто немаат цврсти сапуни, но ако налетате на некој кој има, прво измијте го сапунот, па потоа втријте го на рацете. И измијте ги добро рацете, барем 20-30 секунди. Ако триете доволно упорно, бактериите ќе бидат уништени“, објаснува Ларсон.
