Фудбалската федерација на Македонија (ФФМ) овозможува бесплатен влез за ученици од прво до деветто одделение, за деца без родители и од социјално ранливи категории за натпреварот Македонија – Луксембург кој ќе се одигра на 9 октомври во Скопје.
Децата можат да дојдат на натпревар заедно со родител или старател, а потребно е само да покажат ученичка книшка на билетарата на арената „Филип Втори“ или на инфо пултот во „Skopje City Mall“ и да го подигнат бесплатно својот билет.
– Целта на оваа активност е создавање навика кај најмладите за одење на спортски натпревари од рани години, со цел уште повеќе да го засакаат фудбалот и да можат своите идоли од поблиску да ги гледаат. Преку спортот децата на еден здрав начин се дружат, создаваат здрави навики, се натпреваруваат меѓу себе и се подготвуваат за светот на возрасните. А, секој спортист и тим кој ги брани боите на својата држава, кој придонесува за афирмација на својата татковина, кој го обединува народот и наметнува победнички
менталитет заслужува поддршка, изјави Илчо Ѓорѓиоски, претседател на ФФМ.
Од ФФМ ги повикуваат македонските навивачи во што поголем број да ја исполнат Аренат „Филип Втори“ и да и помогнат на Македонија во обидот да дојде до првите бодови во квалификациски циклус Еуро 2016.
– Репрезентацијата отсекогаш била сцената на која македонците го потврдувале талентот и квалитетот, но без помош од нацијата, без поддршка од народот, нема да успееме. Полните трибини и еуфоријата пред и за време на натпреварите се наша голема победа, истакнуваат од ФФМ
