Ѕвездата на Реал Мадрид Анхел ди Марија се виде премногу скапа дури и за мултимилиардерите од ПСЖ. Ова го објави лично претседателот на францускиот клуб Насер ал Келаифи на денешната прес-конференција.
Всушност, бараните 80 милиони евра не се проблем за арапските сопственици на ПСЖ. Но тешкотиите доаѓаат од нормите за почитување на финансискиот ферплеј, кои веќе беа прекршени од ПСЖ и затоа клубот заработи казна од 60 милиони евра.
Шампионот на Франција веќе за 50 милиони евра го купи Давид Луис од Челзи, а не направиле значајна продажба и не можат да си дозволат да се фрлат уште 80 милиони евра, иако парите не се никаков проблем за раководството.
„Вистина е дека се водеа преговори со Реал Мадрид за Анхел ди Марија. Се сретнав лично со претседателот Флорентино Перес. Но играчот е прескап за нас и ставивме точка на разговорите“, изјави Ал Келаифи.
Аргентинецот има договор со европскиот шампион до 30-ти јуни 2018-та година. Шпанците му бараат нов тим, за да не ги нарушат и тие правилата на финансискиот ферплеј по купувањето на Хамес Родригез од Монако за 80 милиони евра.
