Италијанскиот гигант Интер ќе заработува по 20 милиони евра годишно од маркетинг компанијата „Infront“ која ќе ги поседува правата за продажба на предмети со брендот на миланскиот клуб.
На прес-конференција претседателот на „нероазурите“ Ерик Тохир најави дека во наредните четири години 18-кратниот италијански шампион ќе добие 80 милиони од договорот со швајцарската компанија.
„Имаме договор, кој е еквивалентен на 80.000.000 за период од четири години. Сумата е зголемена за 50 % во однос на онаа од претходниот договор. Нема да запреме тука. Имаме и други планови за Интер. Ќе разговараме и со други спонзори, ќе купиме двајца нови играчи“, се довери шефот на „црно- сините“.
Новиот сопственик на тимот од „Џузепе Меаца“ има големи планови за клубот, па тој сака веќе во следната сезона Интер да биде меѓу конкурентите за титулата во Серија А, но и посакува и добар настап на евросцената, иако „нероазурите“ со моменталната петта позиција на табелата ќе можат да обезбедат пласман само во Лига Европа.