ПСЖ нема намера да ја продава својата рекордна инвестиција во минатата година, Единсон Кавани. Тоа го изјави лично сопственикот на клубот Насер Ал-Хелаифи.
Од неодамна зачестија информациите дека поранешниот ас на Наполи ќе ја напушти Франција, бидејќи Уругваецот до моментов останува во сенка на Златан Ибрахимовиќ. Поради монструозната форма на Швеѓанецот, Кавани е принуден да игра како крило, позиција која не му е многу по вкусот. Пред првиот натпревар против Челзи од 1/4-финалето на Лигата на Шампионите тој ги засили гласините за заминувањето, велејќи дека ќе ги разгледа опциите, ако ситуацијата не се промени.
ПСЖ ги надигра „сините“ од Лондон и триумфираше со 3:1 во средата, а на средбата повреда заработи Ибрахимовиќ поради која тој ќе отсуствува еден месец од терените. Па најверојатно Кавани ќе добие шанса да игра како централен напаѓач, но Ал-Хелаифи планира да го задржи дури и настаните да не беа еволуирале овој начин.
„Кавани е многу важен за нас, тој е професионалец и дава се од себе. Јас го ценам тоа. Ако тој сака да ја смени својата позиција, тоа не е негово решение. Тренерот решава и Кавани го разбира тоа“, вели сопственикот на ПСЖ.
„Тој е тука за да игра, каде што ќе го постави тренерот. Тој може да се дискутира за работи со тренерскиот штаб и клубот, но одлуката ќе биде наша. Тој е ѕвезда за овој тим и ќе остане тука“, изјави Ал – Хелаифи.