Српскиот репрезентативец Немања Матиќ потврди дека се враќа во својот поранешен клуб Челзи. Фудбалерот на Бенфика го одигра последниот натпревар за „лисабонските орли“ при победата со 2:0 над Порто, а потоа откри дека повторно ќе ја проба среќата во англиската Премиерлига.
Матиќ веќе играше за Челзи, но во 2009-та година беше искористен како дел од договорот за дефанзивецот Давид Луис.
Се очекува „сините“ од Лондон да одвојат околу 20 милиони фунти за услугите на 25-годишниот играч од средниот ред.
„Да, тоа беше мојот последен натпревар за Бенфика“, призна Матиќ по победата од 2:0 над Порто.
„Сакам да им се заблагодарам на сите во клубот, како и на навивачите. Бенфика ќе остане засекогаш во моето срце. Во овие две години и половина го дадов најдоброто од себе на секој тренинг, во секој натпревар и сега е вистинскиот момент да се повлечам. Сакам да се развивам, сакам да одам во подобро првенство, сакам да одам во Челзи, клуб, кој исто така е во моето срце. Секогаш сум го давал најдоброто од себе за тимот, за клубот и навивачите. Се надевам дека сите го разбираат ова и ја разбираат мојата позиција и желба“, рече српскиот репрезентативец.
