Во 1969-та, четири години откако Николае Чаушеску стана претседател на Романија, Дачија започна со производство на моделот 1300, во основа на моделот Рено 12, но само со друг знак.
Иако производството на францускиот модел престана во осумдесетите години, Дачија со развојот на 1300 продолжи цели 35 години, се до 2004-та.
Истата година наследникот пристигна во вид на моделот Логан, кој засега не успеа да го достигне култниот статус на 1300. Сепак, никој неможе да го обвини за тоа, затоа што на пазарот е само осум години.
Денеска ви го претставуваме концептот Дачија 1300, модерна интерпретација на овој класичен седан, дизајниран од страна на романскиот уметник Александру Марис.
За разлика од својот претходник, модерниот 1300 не е повеќе „народен автомобил“, туку луксузен седан, подготвен на пазарот да им се спротивстави на Ауди А7, Мерцедес С-класа и Порше Панамера.
Овој автомобил се очекува да го придвижува моќен V8 агрегат во комбинација со електричен мотор, а за разлика од оргиналниот 1300, кој имаше погон на предната осовина, современата верзија моќта би ја распределувала на задните тркала.
Би било навистина убаво ваков автомобил да заживее, но засега постои само имагинацијата на нејзиниот дизајнер.
