Приходите на „Disney“ за последниот квартал од минатата година ги надминаа очекувањата на аналитичарите на Волстрит, потпомогнати од сегментот за тематски паркови, одморалишта и крстарења, објави „CNBC“.
Сегментот за искуства за прв пат објави квартални приходи од над 10 милијарди долари. Домашните тематски паркови имаа приходи од 6,91 милијарди долари, а меѓународните паркови имаа приходи од 1,75 милијарди долари, и двата се зголемени за 7% во однос на истиот период претходната година.
Нето добивката за кварталот што заврши на 27 декември изнесуваше 2,48 милијарди долари, или 1,34 долари по акција, што е намалување од 2,64 милијарди долари, или 1,40 долари по акција, една година претходно.
Вкупните приходи на „Disney“ за фискалниот квартал изнесуваа 26 милијарди долари, што е зголемување од 5% во однос на истиот период од претходната година.
Во своите насоки за фискалната 2026-та година, компанијата соопшти дека е на добар пат да откупи акции од 7 милијарди долари. Исто така, очекува двоцифрен раст на прилагодената заработка по акција и оперативен приход од 19 милијарди долари.
За следниот фискален квартал, „Disney“ очекува нивниот стриминг оддел, кој ги вклучува „Disney+“ и „Hulu“, да пријави оперативен приход од околу 500 милиони долари, што е зголемување од околу 200 милиони долари во однос на истиот период минатата година.
Сепак, се очекува сегментот „Искуства“ да пријави „умерен“ раст на оперативниот приход поради предизвиците со посетеноста на меѓународните тематски паркови, како и трошоците пред лансирањето на новата линија на крстарења и отворањето на „World of Frozen в Disneyland Paris“.
