Ако мислевте дека „ChatGPT“ е корисен „сам по себе“, подгответе се за нова димензија на продуктивност. „OpenAI“ официјално го лансираше својот „App Store“, интегриран директно во интерфејсот на најпопуларниот четбот со вештачка интелигенција во светот.
Овој потег го означува преминот на „ChatGPT“ од обична „паметна канцеларија“ во вистинска оперативна платформа. Новиот директориум, достапен и на веб и на мобилни уреди, ги обединува поранешните „додатоци“ и новите, наменски апликации развиени од партнери и од развивачи од трети страни.
Што значи ова за корисниците?
Системот функционира слично како „App Store“ на „iPhone“ или „Google Play Store“. Корисниците можат да пребаруваат по категории, да се информираат за политиките за приватност на секоја апликација и да ги додадат на својата „ChatGPT“ сметка со еден клик. Откако ќе се инсталираат, овие апликации ѝ овозможуваат на вештачката интелигенција да „излезе“ од полето за текст и да извршува конкретни задачи во ваше име – од креирање плејлисти до уредување фотографии.
Порталот „TechRadar“ веќе ја тестираше понудата и издвои неколку примери за тоа што може да се направи со овие апликации.
Apple Music
Музичките ентузијасти ќе ја обожаваат оваа интеграција. Наместо рачно да пребарувате песни, сега можете да побарате од „ChatGPT“ да креира плејлисти врз основа на одредени теми, расположенија или жанрови. Најдобриот дел е што вештачката интелигенција може директно да ги додаде песните во вашата „Apple Music“ библиотека – како личен дигитален диџеј.
Gmail
Иако можеби не звучи како најзабавната алатка, оваа интеграција е исклучително корисна за продуктивност. Со поврзување на „Gmail“, „ChatGPT“ може да стане ваш личен асистент што го „чешла“ сандачето – сумира долги преписки, издвојува клучни информации и дури предлага нацрт-одговори. Сонот за „Inbox Zero“ никогаш не бил поблиску.
Photoshop
За креативците, директното поврзување со „Photoshop“ отвора можност за побрза и понапредна обработка на фотографии. Иако слични функции постоеле и претходно, официјалната апликација овозможува подлабока манипулација и визуелно генерирање директно од разговорот – без потреба од напуштање на „ChatGPT“.
Canva
Доколку „Photoshop“ ви е премногу сложен, „Canva“ е одлична алтернатива. Без разлика дали креирате презентација, објава за социјални мрежи или лого, „ChatGPT“ сега може да ја користи богатата библиотека со шаблони и алатки на „Canva“ за да ги визуелизира вашите идеи за неколку секунди.
AllTrails
Љубителите на природата и планинарењето добиваат моќен дигитален водич. Интеграцијата со платформата „AllTrails“ овозможува „ChatGPT“ да препорачува пешачки патеки според вашата локација, тежината на теренот или знаменитостите што сакате да ги посетите, со пристап до база од стотици илјади рути.
Што следува?
„OpenAI“ ги повика програмерите ширум светот да создаваат нови алатки што „го прошируваат контекстот на разговорите и овозможуваат конкретни дејствија“. Иако ова е само почеток, јасно е дека иднината на вештачката интелигенција не се мери само според тоа што знае, туку и според тоа што може да направи за вас во апликациите што веќе ги користите.
Секако, останува и прашањето за приватноста – тема што е релевантна и при користење на самостоен четбот со вештачка интелигенција, а уште повеќе при интеграција со апликации од трети страни.
