Цените на паметните телефони би можеле да пораснат во просек за 6,9 проценти во 2026-та година поради недостаток на мемориски чипови предизвикан од силната побарувачка од секторот за вештачка интелигенција (AI), според ново истражување на „Counterpoint Research“.
Прогнозата е значајна промена од претходната проекција во која беше најавено зголемување на цените на телефоните од 3,6 проценти, објавува „CNBC“.
Дополнително, глобалните испораки на паметни телефони би можеле да се намалат за 2,1 процент во 2026-та година, за разлика од претходната проекција во која беше предвиден стабилен резултат или малку позитивен раст.
Главната причина лежи во зголемувањето на цените на мемориските чипови и тесните грла во синџирот на снабдување со полупроводници.
Проширувањето на центрите за податоци со AI ја зголеми побарувачката за системите на „Nvidia“, кои користат мемориски компоненти од производители како што се „Samsung“ и „SK Hynics“, водечките добавувачи на меморија на глобалниот пазар.
„DRAM“, вид „RAM“ меморија што се користи и во центрите за податоци со ВИ и во паметните телефони, е особено тешко погодена.
Поради несовпаѓање помеѓу понудата и побарувачката, цените на „DRAM“ нагло пораснаа оваа година, што директно се одразува на трошоците за производство на мобилни уреди.
„Counterpoint“ проценува дека за телефоните во понискиот ценовен опсег, под 200 долари, трошоците за материјали се зголемиле за 20 до 30 проценти од почетокот на годината, додека во средниот и повисокиот сегмент тие се зголемиле за 10 до 15 проценти.
Истражувачите велат дека компаниите веројатно ќе пренесат дел од овие трошоци на потрошувачите, што го објаснува прогнозирано зголемување на просечните цени, а кинеските производители на телефони во средниот и понискиот ценовен опсег ќе бидат особено под притисок, се додава во студијата.
