Синдикатот на професионални фудбалски клубови во Франција (UCPF) денеска соопшти дека планира да го одложи планираниот штрајк на натпреварите во 15-тото коло од Првата лига и 16-тото од Втората лига.
„UCPF“ и Француската лига (LFP) претходно се договорија да стапат во штрајк поради воведувањето на „супер“ данокот за платите на фудбалерите.
„UCPF“ вчера имаше состанок со медијаторот на француската влада, а денеска соопштија дека го одложуваат бојкотот на натпреварите во Првата и Втората лига, кои се на програмата од 29-ти ноември до 2-ри декември.
Претседателот на Франција, Франсоа Оланд најави донесување на законот според кој данокот на платите ќе важи за оние фудбалери кои имаат плата од над милион евра и поради тоа ќе требаат да платат 75 проценти.
„UCPF“ бараше фудбалерите да бидат ослободени од овој данок, но Оланд го одби овој предлог.
Последен пат француските клубови штрајкуваа во 1972-та година.