Американскиот производител на електрични автомобили „Tesla“ се соочува со сериозна криза на европскиот пазар. Во април, бројот на новорегистрирани возила „Тесла“ во Европската Унија се намали за повеќе од половина.
Според податоците од здружението на производители ACEA, регистрирани се само 5.475 нови возила – пад од дури 52,6 проценти во споредба со истиот месец минатата година.
Податоците за првиот дел од годината исто така не се охрабрувачки: во првите четири месеци од 2025 година, Tesla продаде вкупно 41.677 возила, што претставува пад од 46,1 процент.
За „Tesla“, која со години е водечка во секторот за електрична мобилност и агресивно го освои европскиот пазар – на пример, со отворањето на Гигафабриката во Гринхајде во германската покраина Бранденбург – ова е силен удар. Но, се чини дека пионерот на електричната мобилност сè повеќе заостанува зад конкуренцијата, пишува tagesschau.
Според анализата на консултантската фирма „Jato Dynamics“, „Tesla“ падна под десет конкуренти во Европа за прв пат во април, вклучувајќи ги „Volkswagen“, „BMW“, „Reno“ и особено кинескиот „BYD “.
Според податоците на „Jato Dynamics“ – кои опфаќаат 28 земји, не само членки на ЕУ – „BYD “ продал 7.231 возила во април, само малку повеќе од 7.165-те на „Тесла“. Аналитичарот на „Jato Dynamics“, Фелипе Муњоз, го нарече ова „пресвртница“ за европскиот пазар на автомобили, особено имајќи предвид дека „Tesla“ доминира со години, додека „BYD “ неодамна влезе во трката.
BYD стратешки се фокусираше на пазари како што се Велика Британија, Шпанија и Италија. Кинеските производители се сè уште присутни во Германија во помала мера, но овој удел постојано расте.
BYD го проширува своето присуство на германскиот пазар првенствено преку продажба на компании за изнајмување автомобили и таканаречена саморегистрација, додека уделот кај приватните купувачи засега останува многу низок – под 12 проценти. Ситуацијата е поинаква за германските производители: иако поголемиот дел од продажбата сè уште се однесува на деловни клиенти, на пример, Mercedes има удел од приватни клиенти од речиси 37 проценти, додека брендот VW има удел од околу 26 проценти.
