Со наближувањето на зимскиот преоден рок гласините околу тоа кои од најдобрите играчи ги сакаат големите тимови, почнуваат да се зајакнуваат. Еве неколку кои, ако се реализираат, би биле од голема важност до крајот на сезоната.
5. Марко Ројс (Борусија Дортмунд).
Дваесет и четири годишниот германски репрезентативец стана еден од најпосакуваните играчи во Европа. Се зборува дека Арсенал, Манчестер Сити и Манчестер Јунајтед се обидуваат да ги обезбедат неговите услуги во оваа зима. Има некаква веројатност тој да се раздели со Борусија Дортмунд во јануари, но тоа зависи од продажбата на неговиот соиграч Роберт Левандовски. Ако Левандовски си замине, тешко може да се поверува дека Борусија ќе се раздели со двајцата најдобри играчи, освен ако и за двајцата нема некакви многу големи понуди.
4. Хуан Мата (Челзи).
По враќањето на Жозе Мурињо на „Стемфорд Бриџ“, Мата добива многу малку шанси за докажување и се зборува дека шпанскиот репрезентативец може да оствари трансфер во Манчестер Јунајтед вреден 35 милиони фунти. Постои голема веројатност Мата да го напушти Челзи во овој преоден рок. Прашањето е дали сепак ќе остане во Премиер лигата, бидејќи се споменува дека и ПСЖ исто така подготвува понуда за него.
3. Луис Суарез (Ливерпул).
Откако цело лето не знаеше што ќе биде со неговата иднина, Луис Суарез остана на Енфилд. Изгледа сепак историјата околу него се повторува уште еднаш, откако се појави информацијата дека Реал Мадрид упатиле многу привлечна понуда до Ливерпул, според која шпанскиот гигант може да ја плати клаузулата за неговото ослободување и на англискиот тим да му даде уште еден играч. Тешко е да се поверува дека откако остана на Енфилд, а Ливерпул ја започна сезоната ветувачки, тимот ќе сака да се раздели со него, освен ако нема многу примамлива понуда.
2. Роберт Левандовски (Борусија Дортмунд).
Полскиот напаѓач е поврзан со премин во трите од најголемите клубови во Европа – Челзи, Баерн Минхен и Манчестер Јунајтед. Тој е уште еден играч за чија иднина во текот на летото имаше многу гласини. Тие не престанаа дури и откако сезоната започна. Речиси сигурно е дека полскиот напаѓач ќе смени тимот во текот на зимата, но прашањето е каде ќе се најде на крајот. Полски весник напиша дека преминот во Минхен веќе е финализиран, но според новите гласини Манчестер Јунајтед е фаворит за неговиот потпис.
1 . Диего Коста (Атлетико Мадрид).
Изненадувањето на сезоната е најновиот додаток во нападот на шпанскиот национален тим – Диего Коста, кој е поврзан со трансфер вреден 30 милиони фунти во Арсенал. Шансите да ја напушти Шпанија во јануари, сепак се мали. Коста оваа сезона ја започна многу добро, а и Атлетико Мадрид по подолго време ја има најдобрата сезона и веројатно нема да сакаат да се разделат со него пред крајот на сезоната.