Продажбата на Тесла на пазарот на ЕУ продолжи да паѓа во првиот квартал од 2025 година, со пад на регистрациите за 45% на годишно ниво, според податоците објавени денеска од страна на Европската асоцијација на производители на автомобили (ACEA).
Во ЕУ, бројот на регистрации на Тесла падна на 36.167 возила во споредба со 65.774 во првите три месеци од 2024 година, што е најголем релативен пад во тој период меѓу големите производители на автомобили.
Продажбата на Тесла во Европската унија падна за 36% во март во споредба со март 2024 година.
Континуиран негативен тренд
Ова е продолжување на негативниот тренд за американскиот производител на автомобили во сопственост на милијардерот Илон Маск, иако падот благо забави во однос на почетокот на годината.
Регистрациите се намалија за 49% на годишно ниво во периодот од јануари до февруари.
Групацијата Volkswagen забележа благ пораст од речиси 5%, додека BMW забележа скромни 0,4%. Mercedes-Benz, пак, забележа пад од 6,2%.
Другите електрични автомобили во пораст
Севкупно, регистрациите на нови автомобили во Европската унија паднаа за 1,9% во првиот квартал, иако електричните возила (EV) забележаа раст од 23,9%, достигнувајќи пазарен удел од 15,2%.
Регистрациите на електрични автомобили значително се зголемија во март во Германија, Белгија и Данска, а почнуваат да се зголемуваат во Шпанија и Италија, кои заостануваат далеку зад нивните европски соседи.
Од друга страна, тие се намалија во Франција (-14% во однос на март 2024 година), при што сè уште се чувствуваат ефектите од намалувањето на еколошкиот бонус.
Хибридите се повеќе го заземаат европскиот пазар
Овој напредок во електричните возила во Европската унија не е доволен за автомобилското лоби, што укажува на „сериозен јаз меѓу амбициозните цели за декарбонизација и реалноста на побавно од очекуваното прифаќање на потрошувачите“, според Сигрид де Ври, генерален директор на ACEA.
Во меѓувреме, хибридните модели се повеќе го заземаат европскиот пазар: 35,5% од автомобилите регистрирани во првиот квартал беа хибридни, наспроти 28,7% од бензинските модели.
Тесла во вторникот објави полоши од очекуваните резултати за првиот квартал, на кои значително влијаеше соработката на Илон Маск со администрацијата на Трамп.
„Како што знаете, моето време во владата имаше свои последици“, изјави претходно Маск, најавувајќи дека од мај ќе посвети многу повеќе време на Тесла.
