Токму кога мислевме дека повеќе нема да обрнуваме внимание на заканата од удар на астероид во Земјата во 2032 година, тој астероид сега се појави како закана за единствениот сателит на Земјата – Месечината.
Астероидот 2024 YR4, таканаречениот убиец на градот, кој првично беше причина за загриженост, повеќе не и се заканува на Земјата, но новата студија сугерира дека Месечината можеби е во опасност. Според извештајот предводен од планетарниот астроном Ендрју Ривкин од американскиот универзитет Џонс Хопкинс, астероидот би можел да се судри со Месечината за време на неговото прелетување во 2032 година.
Астероидот првпат беше откриен на 27 декември 2024 година, а првичните проекции покажаа 3,1 отсто шанса да удри во Земјата во 2032 година. И покрај ова, 2024 YR4 сè уште претставува потенцијална закана за нашата Месечина.
За да се подобрат предвидувањата, научниците ќе продолжат да го набљудуваат астероидот со вселенскиот телескоп Џејмс Веб (JWST) во мај 2025 година. Траекторијата и составот на астероидот дополнително ќе бидат анализирани, со уште еден голем прозорец за гледање во 2026 година. Тимот на Ривкин утврди дека 2024 YR4 е широк приближно 60 метри. Ако тоа е случај, според пресметките на научниците, ударот на Земјата би ослободил енергија помеѓу 2 и 30 мегатони ТНТ, создавајќи радиус на експлозија до 80 километри.
Доколку тој астероид би удрил во Земјата, ослободувањето на енергија би било катастрофално и споредливо со најмоќните нуклеарни тестови. Меѓутоа, бидејќи Земјата не е во опасност, фокусот сега е на следење на потенцијалот на тој астероид да удри на Месечината.
