Постојат чекори што можете да ги преземете за да ги минимизирате ефектите од следењето од „Metа“ и други компании.
Следењето на корисничките податоци од страна на услугите на „Metа“ не е ограничено само на „Facebook“ и „Instagram“, туку е многу пошироко. Но, постојат некои методи што можете да ги користите за да избегнете кршење на приватноста додека не стапат на сила некои општи мерки за регулирање на оваа сфера.
Пребарувањата за содржини што овозможуваат бришење и исклучување на овие платформи вртоглаво пораснаа откако „Metа“ објави промени во политиката за кои критичарите велат дека се усогласени со претстојната администрација на Трамп. Ова вклучува слабеење на политиките за говор на омраза, оставајќи ги корисниците поранливи на дискриминација.
Но, затворањето на вашите сметки на социјалните мрежи не е доволно за да излезете од дофатот на „Metа“. Компанијата, наводно, ги следи корисниците на милиони веб-локации и апликации, собирајќи податоци дури и ако не ги користите активно нејзините платформи.
За да ја заштитите вашата приватност, треба да знаете како „Metа“ ги собира таквите информации и како да го ограничите нејзиниот пристап.
Следењето на „Metа“ не е ограничено само на „Facebook“ и „Instagram“. Компанијата има алгоритми за следење вградени во милиони веб-страници и на тој начин може да следи што прават корисниците на интернет. Овие алгоритми можат да собираат многу чувствителни информации како што се историјата на пребарување и гледање содржини, финансиски информации, па дури и здравствени информации.
Дури и ако ја деактивирате вашата сметка на „Facebook“ или „Instagram“, „Meta“ ќе продолжи да ги собира вашите податоци преку надворешни методи.
Можеби нема да можете целосно да го избегнете надзорот на „Meta“, но има чекори што можете да ги преземете за да го намалите нејзиниот досег при следењето на вашите приватни податоци.
Променете ги вашите поставки за приватност на „Facebook“ и „Instagram“
Со менување на поставките на вашата сметка, можете да го ограничите начинот на кој „Meta“ може да ги користи вашите податоци за да ви прикажува реклами.
– Одете во „Accounts Center“ во поставките на „Facebook“ или „Instagram“.
– Кликнете на „Ad Preferences“, потоа „Manage Info“. Кликнете на „Activity Information from Ad Partners“ и кликнете на „Review Setting“.
– Кликнете на опцијата „No, don’t make my ads more relevant by using this information“ и потврдете.
За да го блокирате „Meta“ од споделување на вашите податоци со огласувачи во други апликации, одете во „Ad Preferences“, па „Manage Info“. Од тука, кликнете на „Ads Show Outside of Meta“, а потоа кликнете на „Not Allowed“.
Променете ги поставките за приватност на телефонот
Вашиот паметен телефон собира податоци до кои „Meta“ може да пристапи, па затоа е неопходно да се приспособат и овие поставки.
– Исклучете или оневозможете „ID“ за рекламирање. Ова ја ограничува способноста на „Meta“ да ве следи од апликација до апликација. Инструкциите се разликуваат за корисниците на „iPhone“ и „Android“.
– Блокирајте го пристапот до локацијата на „Meta“ со исклучување на пристапот до локација на „Facebook“ и „Instagram“.
Иако сите чекори споменати погоре помагаат да се ограничи следењето, ќе треба да се спроведат законски решенија за подобра заштита на корисниците. Компаниите, како „Meta“, не треба да имаат неограничен пристап до личните податоци на корисниците. Сè додека не се зајакнат законите за приватност, управувањето со поставките во апликациите останува најдобриот начин за заштита на вашите лични податоци.
