Концептот со логото на „AUDI“ на предната страна го најавува лансирањето на нова подмарка на електрични автомобили.
„Audi“ направи потег кој ќе збуни многумина. Имено, германскиот производител лансира нов бренд „AUDI“ во Кина, без логото со четири прстени, а претставениот концепт „AUDI E“ најавува три сериски електрични модели во среден и голем автомобилски сегмент.
За што точно се работи? „AUDI“ е новиот подбренд на „Audi“ за електрични возила наменети за кинескиот пазар, создаден во соработка со кинеската „SAIC“, пишува „Carscoops“.
Концептот „AUDI E“ дава поглед на идните модели кои нема да ги краси познатото лого со четири прстени. Концептот се потпира на нова механичка платформа, има 775 ks и автономија од 700 километри според кинескиот „CLTC“ стандард.
Стратегијата на „Audi“ да го претстави новиот бренд „AUDI“ во Кина е потег за придобивање на локалните клиенти.
Новото/старото име на брендот (со големи букви за да биде забележливо) го замени традиционалното лого со четири прстени за да „ја означи врската, но и диференцијацијата во однос на сестринскиот бренд“, објаснуваат од компанијата.
„Audi“ тврди дека овој идентитет го обезбедува најдоброто од двата света: „Непогрешливата „Audi“ ДНК се среќава со иновациите од Кина“.
Во превод: тоа е „Audi“, но не е… иако всушност е. Ако не ви е јасно, „Audi“ дополнително објаснува.
„AUDI е обликуван 100% од „Audi“ ДНК и го претставува мотото „Vorsprung durch Technik“ во ерата на интелигентни, електрични и поврзани возила“. Јасно како ден, нели?
„AUDI“, новиот подбренд, е резултат на заедничкиот проект меѓу „Audi“ и домашниот гигант „SAIC“, под раководство на Фермин Сонеира, поранешен шеф на линијата на „Audi“ за електрични модели.
Концептот најавува три идни сериски модели, чие производство се очекува од средината на 2025-та година.
Концептот „AUDI E“ е опишан како целосно електричен „Sportback“ и репер за новата генерација возила.
Должината на возилото е 4.870 mm, ширина 1.990 mm и висина 1.460 mm, со меѓуоскино растојание од 2.950 mm.
За споредба, ова се приближно исти димензии како и новиот „Audi A5“ со „SUS“ мотор, но дизајнот е прилагоден на специфичните барања на кинеските клиенти.
Најочигледната визуелна разлика на надворешноста е отсуството на логото со четири прстени, кое е заменето со осветлени букви „AUDI“ на двете страни на автомобилот, како и на центарот на тркалата.
Наместо традиционалната предна маска и довод, концептот „Е“ има „LED“ светлосни елементи и сензори за системите за автомобили „ADAS“, што претставува малку поинакво „лице“ од она што сме навикнати да го гледаме кај моделите на „Audi“.
Внатрешност во кабината
Кабината на концептот „AUDI E“ е обложена со тапацир од микрофибер и осветлени дрвени детали.
На контролната табла доминира голем, заоблен 4K екран на допир, кој ги интегрира таблата со инструменти, инфозабавниот систем и дигиталните ретровизори во еден екран низ целата ширина на автомобилот.
Единствените физички контроли се прекинувачите на прозорците и копчињата на воланот.
Електричен погон
Концептот се потпира на нова „напредна дигитализирана механичка платформа“, развиена во соработка со „SAIC“.
Моќта ја обезбедуваат два електромотори, по еден на секоја оска, со комбинирана моќност од 775 ks (570 kW) и вртежен момент од 800 Nm, што овозможува забрзување од 0 до 100 km/h за само 3,6 секунди.
„AUDI“ ветува нивоа на вистински „Audi“ на удобност и динамика на возење, заедно со софистицирани „ADAS“ системи специфични за Кина.
Батеријата со капацитет од 100 kWh овозможува автономија од 700 km според стандардот „CLTC“.
Платформата 800V поддржува супербрзо полнење – што се преведува на повеќе од 370 km досег за само 10 минути.
Првите три сериски модели под брендот „AUDI“ ќе бидат наменети за сегментите со средна и голема големина, а се очекува да се најдат на пазарот во 2025-та година.
Иронијата е што „Audi“ веќе има растечка палета на електрични возила во Кина, вклучувајќи модели како што се „Q4 e-tron“ (во соработка со „FAW“), „Q5 e-tron“ (SAIC), „Q6 e-tron“ (SAIC) и „e-tron GT“.
Зошто беше потребен целосно нов бренд? Официјалното објаснување е дека му овозможува на „AUDI“ да обезбеди „полокализиран“ производ со влијание на „SAIC“, а притоа да ја користи технологијата и репутацијата на „Audi“.
Дали пазарот така ќе гледа или само како „Audi“ во различен пакет, останува да видиме.
