Шеќерот во крвта или гликозата е главниот извор на енергија за клетките на телото.
Гликозата се добива од храната што ја јадеме, особено од јаглехидратите како леб, тестенини, овошје и шеќер. Откако храната ќе се разложи во дигестивниот систем, гликозата влегува во крвотокот каде што се транспортира до клетките со помош на хормонот инсулин произведен во панкреасот.
Шеќерот во крвта е важен бидејќи му овозможува на телото да функционира правилно. Ги храни мозокот, мускулите и сите органи, обезбедувајќи ја енергијата потребна за секојдневните активности.
Во нормални околности, телото одржува опсег на гликоза во крвта од 3,9 до 6,1 mmol/L. По 60-тата година, опсегот на гликоза малку се зголемува и се движи од 4,56 до 6,38 mmol/L. Кај децата и адолесцентите, во повеќето случаи, референтните вредности се нешто пониски – од 3,33 до 5,55 mmol/L.
Зголемениот опсег на шеќер е јасен знак за хипергликемија, што може да биде поттик за појава на дијабетес. Исто така, тие можат да предизвикаат оштетување на крвните садови, нервите и органите.
WebMD предупредува дека игнорирањето и на најмалите отстапувања од нормата е опасно по здравјето. Главните симптоми на хипергликемија се необјаснет замор, заматен вид, често мокрење и сува кожа.
Нискиот шеќер во крвта или хипогликемијата се јавува кога нивото на гликоза во крвта паѓа под 3,9 mmol/L. Овој феномен е многу поредок, но може да доведе до губење на свеста и мозочен удар.
Хипогликемијата може да биде предизвикана од различни медицински состојби, вклучително и оштетување на бубрезите и црниот дроб. Оние кои страдаат од хипогликемија доживуваат силна слабост, вртоглавица, главоболки и тремор.
