Компанијата „Johnson & Johnson“ (J&J) објави приспособена заработка во првиот квартал што ги надмина очекувањата на Волстрит за раст на продажбата во бизнисот со медицински уреди.
Сепак, вкупните приходи на компанијата за периодот во голема мера беа во согласност со прогнозите, пишува „CNBC“.
Компанијата има корист од закрепнувањето на побарувачката за неитни операции кај постарите лица кои ги одложија тие процедури за време на пандемијата. Оваа зголемена побарувачка ја гледаат компаниите за здравствено осигурување како што се „Humana“, „UnitedHealth Group“ и „Elevance Health“.
Финансискиот директор на „J&J“, Џозеф Волк, изјави за „CNBC“ дека потрошувачите „не сакаат да прават компромиси кога станува збор за нивното здравје, нивната мобилност, нивната способност да живеат исполнет живот“. Тој додава дека е забележано зголемено ниво на процедури од пандемијата.
Вкупните продажби на компанијата за првиот квартал беа 21,38 милијарди долари, што е повеќе од 2% повеќе од првиот квартал од 2023-та година.
Фармацевтскиот гигант објави нето приход од 5,35 милијарди долари, или 2,20 долари по акција, за кварталот, во споредба со нето загубата од 491 милион долари (19 центи по акција) за првиот квартал од 2023-та година. Потоа, сепак, „J&J“ објави еднократни трошоци поврзани на обврските на компанијата поради правните битки поврзани со нивниот талк во прав за бебиња, како и трошоците за одвојување на единицата за здравје на потрошувачите во „Kenvue“.
Без одредени еднократни ставки од финансискиот резултат за кварталот, прилагодената заработка по акција на компанијата изнесува 2,71 долари.
„J&J“ соопшти дека очекува продажбата за цела година да достигне од 88 до 88,4 милијарди долари. Претходната прогноза беше во опсег од 87,8 до 88,6 милијарди долари.
За заработка, компанијата очекува да достигне 10,57 до 10,72 долари по акција, наспроти претходната прогноза од 10,55 до 10,75 долари по акција.
Одделно, компанијата соопшти дека ја зголемува својата квартална дивиденда на 1,24 долари по акција, што е за 4,2% повеќе од претходната бројка од 1,19 долари по акција. Ова ја означува 62-та година на компанијата со последователно зголемување на дивидендата.
Бизнисот со медицински уреди на „J&J“ оствари продажба од 7,82 милијарди долари во првиот квартал, при што приходите се зголемија за 4% на годишно ниво. Волстрит очекуваше приход од 7,87 милијарди долари, според проценките составени од „StreetAccount“.
Производите за затворање рани и уредите за ортопедска траума или сериозни повреди на скелетниот или мускулниот систем се главните придонесувачи за приходите на оваа единица, заедно со продажбата на контактни леќи.
Фармацевтската продажба на компанијата изнесуваше 13,56 милијарди долари, што е раст од околу 1% од година во година. Со исклучок на продажбата на непопуларната вакцина против Ковид, приходите на фармацевтската единица се зголемија за 7% на годишно ниво за извештајниот период.
