Лендерот „Одисеј“ стана првото вселенско летало од американско производство кое слета на Месечината во последните 50 години и почна да испраќа податоци.
Ова го соопшти американската компанија Intuitive Machines.
Компанијата соопшти дека инженерите морале да ги надминат навигациските проблеми за да извршат многу тешко слетување и дека наскоро се очекуваат првите фотографии од лендерот од површината на Месечината, пренесе Си-Ен-Ен.
Американската вселенска агенција НАСА на платформата X објави дека на површината на Месечината слетало летало без екипаж и дека леталото содржи инструменти на НАСА, чии податоци ќе овозможат подготовка на идни истражувања на Месечината со екипаж.
Мисијата на лендерот „Одисеј“ има за цел да ја процени околината на јужниот пол на Месечината пред да биде планирана мисија на НАСА со екипаж да слета на сателитот на Земјата кон крајот на 2026 година.
Your order was delivered… to the Moon! 📦@Int_Machines' uncrewed lunar lander landed at 6:23pm ET (2323 UTC), bringing NASA science to the Moon's surface. These instruments will prepare us for future human exploration of the Moon under #Artemis. pic.twitter.com/sS0poiWxrU
— NASA (@NASA) February 22, 2024
Месечевата мисија на САД пропадна минатиот месец, бидејќи вселенското летало Peregrine One, лансирано во јануари со цел да слета на Месечината, беше уништено над Пацификот откако наиде на проблеми со истекување на гориво.
Таа мисија ја организираше американската приватна компанија Астроботик.
„Одисеј“ е првото вселенско летало лансирано од САД кое слета на површината на Месечината по мисијата Аполо 17 во 1972 година.