Аналитичарите на „Ampere Analysis“ проценуваат дека конзолата „Sony PlayStation 5“ ги надминала продадените конзоли „Xbox Series X/S“ за речиси три спрема еден во оваа година.
„Sony“ имаше и сè уште има големи надежи за својата „PS5“ конзола. Компанијата се надева дека ќе испорача 25 милиони конзоли оваа година и на крајот ќе ја надмине продажбата на „PS4“ од 117,4 милиони единици.
Податоците покажуваат дека е речиси на половина пат, бидејќи неодамна беше објавено дека компанијата продаде над 50 милиони „PS5“ конзоли.
Од друга страна, „Microsoft“ повторно е во неволја кога станува збор за освојување на пазарот. Проценките на аналитичката компанија „Ampere Analysis“ покажуваат дека „Microsoft“ ќе продаде 7,6 милиони „Xbox Series X/S“ конзоли во текот на 2023-та година, во споредба со силните 22,5 милиони продадени конзоли „PlayStation 5“.
Бројките покажуваат дека „PlayStation“ го надмина „Xbox“ оваа година за речиси три спрема еден, при што продажбата на уредите „PS5“ е зголемена за речиси 65% од година во година.
Треба да се напомене дека се работи за проценки, а не за потврдени продажби. Директна и точна споредба не е можна, бидејќи „Microsoft“ во своите извештаи не ја наведува точната продажба на серијата „Xbox“.
Сепак, компанијата случајно го откри пазарниот удел на конзолите „Xbox Gen9“ на неодамнешниот „BIG“ фестивал во Бразил, а слајдот покажува дека од јули 2023-та година, се продадени повеќе од 21 милион „Xbox Series X/S“ конзоли.
За споредба, „Sony“ испорача 38,4 милиони „PlayStation 5“ конзоли во истиот период.