Ветувањето дадено од компанијата „OpenAI“ во септември дека гласовните функции на „ChatGPT“, кои потоа ги воведе само за претплатни сметки „Plus“ и „Enterprise“ на оваа платформа, ќе ги добијат и оние со бесплатни сметки сега е исполнето.
Еден од основачите на овој стартап кој развива вештачка интелигенција (AI), Грег Брокман, на својот профил на „Twitter“ (X) објави дека овие функции официјално почнуваат да допираат до корисниците со бесплатни сметки.
Ова значи дека ако веќе не сте ги добиле, тие треба да стигнат до вашата сметка во наредните недели.
Кога „OpenAI“ првпат ги претстави гласовните функции на „ChatGPT“, призна дека способноста да се создаваат „реални синтетички гласови од само неколку секунди реален говор“ носи нови ризици. На пример, може да им дозволи на злонамерните поединци да имитираат јавни личности или кој било што сакаат.
Како резултат на тоа, беше одлучено гласовните функции на „ChatGPT“ да се фокусираат само на разговори. Тие се напојуваат со модел на текст-во-говор кој може да генерира „човечки звук од само текст и неколку секунди примероци на говор“. „OpenAI“ работеше со актери за да ја создаде оваа способност и нуди пет различни гласови што можете да изберете да ги користите.
Исто така, важно е да се истакне дека гласовните функции на „ChatGPT“ моментално се достапни само на мобилни апликации за „Android“ и „iOS“. Тоа може да се види од соопштението на компанијата, кое ве повикува да ја испробате функцијата со кликнување на иконата на слушалките во апликацијата на мобилните телефони.
Соопштението доаѓа по бурните пет дена за компанијата „OpenAI“, по што следеше разрешување на извршниот директор и еден од нејзините основачи Сем Алтман и оставката на Брокман во знак на протест поради оваа одлука.
Сепак, Алтман и Брокман официјално се вратија во компанијата денес, откако „Microsoft“ објави во текот на викендот дека ги вработил во својот оддел за вештачка интелигенција. Со цел да се смири бурата предизвикана од споменатите настани, можно е во наредните денови „OpenAI“ да објави повеќе вести за својот „ChatGPT“ бот, една од најпопуларните апликации за вештачка интелигенција во светот.
