Оваа година една од најпопуларните европски модели во последните децении прослави 30 години од своето деби пред јавноста. Станува збор за „Fiat Punto“, кој ја прослави својата премиера во 1993-та година и тогаш имаше тешка задача да го наследи исклучително успешниот модел „Uno“.
Малиот сладок италијански автомобил имаше многу модерен дизајн за своето време, беше достапен во верзии со три и пет врати и се издвојуваше меѓу своите конкуренти со изобилство на внатрешен простор. Моделот се покажа како практичен, пријатен за возење и извонредно сигурен, така што пазарниот успех не чекаше долго – приближно 3,43 милиони единици беа продадени од првата генерација.
Палетата на модели вклучуваше бензински мотори со работен волумен од 1,1, 1,2, 1,4 и 1,6 литри, како и 1,7-литарски дизел (со или без турбополнач).
Наследникот на „Punto“ излезе во 1999-та година со поаголен дизајн и поагресивен изглед. Моделот беше подложен на фејслифтинг во 2003-та година, а неговото производство продолжи до 2010-та година во Италија, па дури и до 2013-та година во српската фабрика „Застава“ во Крагуевац, каде италијанскиот автомобил се произведуваше под името „Застава 10“.
Втората генерација на „Punto“ е исто така хечбек со три или пет врати, а гамата на мотори вклучува бензински мотори со зафатнина од 1,1, 1,2, 1,4 и 1,6 литри, како и дизел со работна зафатнина од 1,7 литри, повторно достапен во атмосферски и турбо варијанти. Од втората генерација, продадени се 2,96 милиони единици.
Третото и за жал последното издание првично беше наречено „Grande Punto“ и беше објавено во 2005-та година. Автомобилот дели заедничка технолошка платформа со „Opel Corsa“, долго пред францускиот концерн „PSA“ да се трансформира во „Stellantis“ и да ги апсорбира и „Opel“ и „Fiat“.
Моделот има убав дизајн, но во однос на квалитетот почнува да заостанува зад некои од главните пазарни ривали, а тоа се одразува и на неговата продажба, која иако солидна (2,67 милиони примероци), е поскромна од оние на неговите двајца претходници.
Во 2009-та година дојде време за фејслифт, кој покрај нов распоред на предниот дел, со себе донесе и промена на името – до крајот на неговото производство, автомобилот се викаше „Punto Evo“. Продажбата во Европа беше прекината во 2018-та година.
Поради промените во условите на автомобилскиот пазар на Стариот континент, „Punto“ до ден денес останува без директни наследници.