Најновата хит апликација од работилницата на Инстаграм, Threads, сè уште не е усогласена со законодавството на ЕУ, па граѓаните не можат да ја користат. Лоши вести за оние кои користеле VPN за ова.
Новата социјална мрежа Threads, своевидна копија на Twitter, се уште е во рана фаза – и недостигаат бројни функции, има само рудиментарен интерфејс, не поддржува хаштагови и слично. Но, засега не прикажува никакви реклами, а излезе токму во време кога Твитер е во лоша состојба. Со тоа, Threads е најбрзо растечката социјална мрежа и воопшто дигитална услуга во историјата, со 100 милиони регистрирани корисници за само пет дена од појавувањето во продавниците за апликации.
Но, тој број на корисници би бил уште поголем, доколку мрежата би била достапна на територијата на Европската Унија. Но, тоа не е така, бидејќи Мета се бори со европските регулатори и институции кои редовно ги казнуваат за пренос на податоци, што не е во согласност со GDPR. Сè додека не се решат тие правни заплетки, Threads нема да биде официјално достапна во ЕУ, па корисниците во Европската унија ќе мора да почекаат уште малку за социјалната мрежа.
Оние кои не можеа да чекаат, а сакаа веднаш да го заменат Твитер и да видат како изгледа оваа хит апликација, претходните денови можеа да користат VPN. Со него тие би можеле да ја сокријат својата вистинска локација, виртуелно да се „преселат“ во некоја од земјите каде што може да се преземат и користат Threads и така да можат да ја користат.
Сепак, сега доаѓаат лоши вести за нив – Мета потврди дека презеле одредени чекори и го блокирале пристапот до новата апликација преку виртуелни приватни мрежи.
Корисниците најпрво почнаа да забележуваат одредени проблеми во нивната работа, нивната содржина не се вчитуваше правилно, а набргу потоа пристигна и потврдата за заштитните мерки на Мета. Ова веројатно ги штити од дополнителни правни проблеми во ЕУ, но можеби ќе сакаат да го забават и астрономскиот раст на бројот на корисници на самиот почеток, додека мрежата е сè уште во зародиш.
Сепак, „Европа останува многу важен пазар за Мета“, велат тие, истакнувајќи дека и Threads ќе стане достапен на тој пазар во догледна иднина.
