Хакерска група спонзорирана од кинеската држава се инфилтрирала во големите инфраструктурни мрежи во САД, објавија во средата Вашингтон, неговите западни сојузници и Мајкрософт, предупредувајќи дека слични кампањи може да се случат ширум светот.
Властите задолжени за безбедноста на информациите во САД, Канада, Велика Британија и Нов Зеланд, предупредија во заедничката изјава на „низа активности“ поврзани со „кинескиот државен сајбер актер, познат и како Волт Тајфун“.
„Оваа активност влијае на мрежите на главните американски инфраструктурни сектори“ и субјектот што ги извршува нападите „може да ги примени истите методи низ целиот свет“, додаваат тие.
Во одвоено соопштение, Мајкрософт рече дека „Волт тајфун“ е активен од средината на 2021 година и дека, меѓу другото, целел важна инфраструктура на островот Гуам, дом на голема американска воена база во Тихиот Океан.
Таа кампања би можела „да ја наруши важната комуникациска инфраструктура меѓу САД и азискиот регион во идни кризи“, предупреди Мајкрософт.
„Набљудуваното однесување води до заклучок дека злонамерниот актер има намера да се вклучи во шпионажа и да го одржува пристапот (до инфраструктурата) што е можно подолго без да биде забележан“, додава американската технолошка групација.