Откриено е дека Google Play Store содржи игри кои во себе имаат скриен малициозен софтвер кој влијае на перформансите на уредот.
Истражувачите од мобилниот истражувачки тим на McAfee пронајдоа 38 копии од популарната игра Minecraft на Google Play Store кои ги инфицираат уредите со Android со рекламниот софтвер „HiddenAds“, кој ги вчитува рекламите во позадина и на тој начин им носи профит на авторот(ите) на овие апликации.
McAfee е член на Алијансата за одбрана на апликации, која е формирана за да го заштити Google Play од сите видови закани.
Апликациите со скриени реклами беа преземени од околу 35 милиони корисници на Android од целиот свет, главно од Соединетите Американски Држави, Канада, Јужна Кореја и Бразил, кои веројатно не забележале дека злонамерната активност на рекламниот софтвер се случува во позадина, бидејќи апликациите го правеле тоа за што биле преземени. Сепак, секое прегревање на уредот, зголемување на потрошувачката на батеријата и пренос на податоци предизвикани од вчитување на голем број реклами е директна последица на преземањето на овие апликации.
Тимот на McAfee ги пријави сите 38 апликации што ги откри и тие потоа беа отстранети од Google Store.
Меѓу отстранетите апликации се Block Box Master Diamond со 10 милиони преземања, Craft Sword Mini Fun со 5 милиони преземања, Block Box Skyland Sword со 5 милиони преземања, Craft Monster Crazy Sword со 5 милиони преземања, Block Pro Forrest Diamond со 1 милион преземања. Block Game Skyland Forrest со 1 милион преземања, Block Rainbow Sword Dragon со 1 милион преземања, Craft Rainbow Mini Builder со 1 милион преземања и Block Forrest Tree Crazy со 1 милион преземања.
Кога корисникот ја започнува играта, во позадина се вчитуваат реклами кои корисникот не ги гледа на екранот.
Истражувачите веруваат дека зад сите овие апликации стои истиот автор.
Иако adware не се смета за особено опасен за корисниците, таквите апликации може значително да влијаат на перформансите на мобилниот уред, да ја загрозат приватноста, па дури и да доведат до инфекции со поопасен малициозен софтвер.
На корисниците на Android кои инсталирале некоја од спорните апликации (целосната листа на апликации може да се најде во извештајот на McAfee) им се советува сами да ги отстранат доколку веќе не се отстранети.
