Кина сподели примероци од Месечината со Русија и Франција, соопшти во понеделникот кинеската Национална вселенска администрација (CNSA), пренесе новинската агенција Ксинхуа.
За време на церемонијата на Денот на вселената во Кина во Хефеи, главниот град на провинцијата Анхуи, CNSA соопшти дека Кина донираше 1,5 грама лунарни примероци на Франција за научни цели кога францускиот претседател Емануел Макрон ја посети Кина претходно овој месец.
За време на посетата на рускиот претседател Владимир Путин на Кина во февруари 2022 година, Кина и дала на Русија 1,5 грама лунарни примероци за научно истражување, објави CNSA, додавајќи дека во март 2023 година, за време на посетата на кинескиот претседател Си Џинпинг на Русија, Русија возвратила давајќи и на Кина исто толку лунарни примероци за научно истражување.
Месечевите примероци што Кина ги сподели со Русија и Франција се дел од примероците што ги врати мисијата Chang’e-5 во декември 2020 година. Во истиот месец, CNSA воведе регулатива за управување со лунарни примероци за да го поттикне истражувањето и да го промовира споделувањето на научното знаење.
Научници од земји како Австралија, Русија, Франција, Соединетите Американски Држави, Велика Британија и Шведска учествуваа во проучувањето на лунарните примероци собрани од Кина.
Кина отсекогаш се придржувала до принципите на мирно користење, еднаквост и взаемна корист за да врши воздушнo-вселенска размена и соработка со земјите ширум светот и да промовира изградба на заедница со заедничка иднина за човештвото во областа на вселената, додаде CNSA.
