По отсуство од речиси девет години, „Meta“ е подготвена повторно да ги обедини „Messenger“ и „Facebook“ во една мобилна апликација.
„Ја тестираме можноста луѓето да пристапат до сандачето на „Messenger“ во рамките на апликацијата „Facebook“ и наскоро ќе го прошириме тоа тестирање“, се вели во официјалното соопштение на „Facebook“.
Нагласено е дека желбата на платформата е ова да биде лесен и корисен начин за поврзување и споделување на содржини на корисниците, било во рамките на апликацијата „Messenger“ или директно во рамките на „Facebook“.
Кога „Meta“ го отстрани „Messenger“ од апликацијата „Facebook“ во 2014-та година, забележа дека целта е да се фокусира развојот на „Messenger“ да го направи најдоброто можно искуство за испраќање пораки и да избегне забуна со различните искуства на мобилни пораки на „Facebook“.
Во обид да биде поконкурентен со „TikTok“, „Meta“ го префрла фокусот на „Facebook“ од апликација која ги поврзува корисниците со пријателите и семејството на платформа која е повеќе фокусирана на откривање содржина и забава.
Клучната причина зошто „Meta“ ги враќа пораките во апликацијата „Facebook“ е „да им олесни на луѓето да го споделат она што го откриваат на „Facebook“ преку пораки, кога, каде и како одговара на нивните потреби, без да мора да се префрлат на друга апликација“, се вели во соопштението на компанијата.
