Властите во Берлин веруваат дека вградувањето на делови од производителите Huawei и ZTE во 5G мобилните мрежи може да се користи за шпионски цели, но и за пристап до делови од клучната германска инфраструктура.
Германската влада планира да им забрани на телекомуникациските оператори да користат одредени компоненти од кинеските компании Huawei и ZTE во 5G мрежите.
Забраната би можела да опфати компоненти веќе инсталирани во мрежите, што ќе бара од операторите да ги отстранат и заменат, објави германски Цајт, цитирајќи владини извори. А Ројтерс потоа доби потврда за таа информација.
Критиките кон компаниите Huawei и ZTE доаѓаат поради нивните блиски врски со кинеските безбедносни служби, па вградувањето на нивните делови во мобилните мрежи 5G може да се користи за шпионажа, па дури и за саботери да пристапат до делови од клучната германска инфраструктура.
Кина ги негира обвинувањата
Huawei, ZTE и кинеската влада ги негираат ваквите тврдења и велат дека забраните се мотивирани од желбата да ги поддржат нивните пазарни ривали.
Германија донесе закон за сајбер безбедност во 2021 година, поставувајќи високи пречки за телекомуникациската опрема за мрежите од следната генерација, но не ги забрани Huawei и ZTE, како што направија некои други земји.
Цајт вели дека владината агенција за сајбер безбедност и Министерството за внатрешни работи со месеци работат на проверка дали компонентите во претстојната 5G мрежа би можеле да ја загрозат германската безбедност.
