Како што пренесува „Guardian“, примерок од првата генерација на „iPhone“ е понуден на аукција во САД, а се очекува да достигне цена од повеќе од 50.000 долари.
Во моментот на пишување на оваа вест, понудената цена за уредот е 2.750 долари, а до крајот на аукцијата остануваат уште нешто повеќе од 16 дена.
Сопственичка на телефонот е уметницата Карен Грин, која го добила на подарок во 2007-ма година. Бидејќи во тоа време веќе имала нов мобилен телефон, а „iPhone“ уредот тогаш не бил компатибилен со нејзината мобилна мрежа, го оставила неотпакуван на полицата.
Во октомври стапила во контакт со аукциската куќа „LCG Auctions“ и им го понудила својот „iPhone“. Таа решила да оди на аукција за да собере пари за да отвори ново студио за тетовирање.
Првата генерација на „iPhone“, која се продава на аукција, е произведена во 2007-ма година, доаѓа со 8GB простор и има камера од 2MP.
Првата генерација на „Apple iPhone“, во времето кога се појави, чинеше 499 долари за модел со 4 GB меморија или 599 долари за модел со 8 GB простор за складирање податоци.