„Да не си ги одземам заслугите, но имав среќа што не играше Ѓоковиќ“

Шпанскиот тенисер Карлос Алкараз призна дека имал среќа да го освои Ју-ес опен, бидејќи Новак Ѓоковиќ не играл во Њујорк. Пред три дена Алкараз ја освои првата Грен слем титула во кариерата, во финалето на Ју-ес опен го совлада Норвежанецот Каспер Руд со 3-1 во сетови.

Младиот шпански тенисер во понеделникот го презеде првото место на АТП-листата. Ѓоковиќ го пропушти последниот Грен слем турнир во сезоната, бидејќи актуелните правила во САД не дозволуваат невакцинирани странци да влезат во земјата.

„Не сакам да си ги одземам заслугите, но имав среќа што не играше Новак Ѓоковиќ. Ѓоковиќ не можеше многу да игра во последно време. Надал играше, но не цела година. Но, како што реков, не сакам да си ги одземам заслугите. Играв цела сезона, имав неверојатни натпревари и неверојатни турнири. Работев навистина напорно за да се случат вакви работи“, заклучи Алкарас.