Светскиот економски форум во Давос е настан кој собира истакнати експерти од целиот свет. Оваа година главна тема беше Украина и војната на нејзина територија. Но, покрај политиката, присутните разговараа и на други теми – технологии и нивниот развој во иднина.
На настанот присуствуваше генералниот директор за телекомуникациска опрема на „Nokia“, Пека Лундмарк. Тој направи неколку љубопитни предвидувања, пишува „CNBC“.
Топ менаџерот верува дека 6G мрежите ќе бидат ставени во функција до 2030-та година. Сепак, тој не ги именуваше земјите кои ќе бидат во првите редови во потрагата по мрежи од шестата генерација.
Пека Лундмарк смета дека тогаш ќе се појави дигитален двојник од сѐ и тоа ќе бара огромна компјутерска моќ.
Експертот го споменува и метауниверзумот, за чие функционирање ќе бидат потребни мрежи со стапки на податоци 100, па дури и 1.000 пати побрзи од денес.
Друго интересно предвидување на Лундмарк е дека многу наскоро луѓето ќе почнат да работат со паметни очила и други паметни уреди, што ќе им овозможи полесно и побрзо да се поврзат на Интернет и да комуницираат меѓу себе.
Шефот на „Nokia“ верува дека паметниот телефон ќе престане да биде најчестиот интерфејс. Тој предвидува дека ќе се појават нови решенија, од кои некои ќе бидат вградени во телото.
Топ менаџерот не прецизира за какви уреди станува збор и како тие ќе бидат сместени во телото, но веројатно зборуваме за чипови и електронски импланти.
