„Sony“ вчера лансираше ново ажурирање за конзолите „PS4“ и „PS5“. Новото ажурирање на софтверот со себе носи голем број функции, вклучувајќи подобрувања на функцијата за разговор за забава, можност за „закачување“ на игрите на почетниот екран, гласовни команди, подобар кориснички интерфејс и ажурирање за безжичните слушалки „Pulse 3D“.
Исто така, „Sony“ додаде темен режим за „PS Remote Play“ за „iOS“ и „Android“.
Сепак, иако овие надградби се многу корисни и интересни, што секако придонесува за подобро корисничко искуство, најавата за поддршка за „VRR“ ќе ги воодушеви сите оние кои имаат компатибилни „HDMI 2.1“ екрани.
„VRR“, или променлива брзина на освежување, динамично ја синхронизира стапката на освежување на графичкиот излез на конзолата. Ова ќе ги подобри визуелните перформанси за игрите на „PS5“ со минимизирање или елиминирање на визуелните артефакти, како што е проблемот со кинење на екранот.
Играњето многу игри на „PS5“ ќе биде значително подобро, бидејќи сцените се рендерираат веднаш, графиката изгледа појасна, а доцнењето или сецкањето се намалуваат, изјавија од јапонската компанија, пренесува „Bytebox“.
„Sony“ вели дека на претходно објавените игри за „PS5“ ќе им треба „patch“ за да бидат целосно оптимизирани за „VRR“, додека игрите што ќе бидат воведени во иднина најверојатно ќе пристигнат со поддршка за „VRR“ кога ќе бидат објавени.
Така, јапонската компанија во иднина ќе објавува „patch“ за веќе постоечки игри, со цел да добие поддршка за „VRR“.
