Сидорф ја смени верата во ислам: Љубов до сите луѓе на светот

Холандската фудбалска легенда Кларенс Сидорф, единствениот фудбалер кој ја освоил Лигата на шампионите со три клуба, преку социјалните мрежи потврди дека ја примил муслиманската вера со поддршка на неговата партнерка Софија Макрамати.

Сидорф е сметан за еден од најдобрите фудбалери од средниот ред во неговата генерација, освојувајќи трофеи од ЛШ со Ајакс во 1995, со Реал Мадрид во 1998 и двапати со Милан во 2003 и 2007 година. Тој имаше 87 настапи за холандската репрезентација и беше на три ЕП и едно Светско првенство, во 1998, кога Холандија стигна до полуфиналето.

„Посебна благодарност за сите пораки во прославата во моето приклучување на муслиманското семејство, пресреќен сум да се придружам на сите браќа и сестри низ светот, посебно со мојата прекрасна Софија, која ме научи подетално за значењето на исламот. Не го сменив своето име и ќе останам со тоа кое ми го дадоа моите родители, Кларенс Сидорф. Праќам љубов до сите во светот“, напиша Сидорф.