Германскиот софтверски гигант „SAP“ ја надмина прогнозата за профит, која ја зголеми неколку пати во минатата година. Оперативната добивка приспособена според валутата за 2021-ва година се зголеми за 1% на 8,41 милијарди евра, објави „SAP“. Групацијата со седиште во Валдорф последен пат го зголеми дијапазонот од 8,1 милијарди на 8,3 милијарди евра во октомври.
Во четвртиот квартал, приходите на групацијата се зголемија за шест отсто на годишно ниво, на нешто помалку од 7 милијарди евра. Приходите во сегментот облачни услуги се зголемени за 28% до 2,61 милијарди евра. Приходите од главниот производ „S/4 Hana Cloud“ дури се зголемија за 65% на 329 милиони евра. На овој начин најголемата софтверска групација во Европа покажува дека нејзината транзиција кон „cloud computing“ и откажувањето од лиценците за софтвер е успешна, пишува германскиот економски дневен весник „Handelsblatt“.
Растот во областа на „cloud computing“ е забележлив и во обемот на нарачки. Тековниот обем на порачки во облак (Current Cloud Backlog) се зголеми за 32% до 20,45 милијарди евра во 2021-ва година, надминувајќи ги внатрешните цели на „SAP“. Нарачките во готовина за „S/4 Hana Cloud“ се зголемија за 84% на 1,71 милијарди евра.
Акционерите со олеснување ги дочекаа новите податоци. Цената на акцијата на „SAP“ порасна во САД за околу три отсто по објавувањето, што ја зголеми нејзината пазарна капитализација за нешто помалку од 5 милијарди евра.
„Нашата сила во бизнисот со облак е очигледна. Забрзаниот раст ветува уште поголеми можности во иднината“, рече извршниот директор Кристијан Клајн.
Инвеститорите се охрабрени и од веста дека „SAP“ планира да купи сопствени акции во вредност од 1 милијарда евра во 2022-ра година. Акциите ќе им бидат предадени на вработените во рамките на Програмата за компензација на „SAP Move“.
„Сакаме дополнително да ја зајакнеме културата на споделување меѓу нашите вработени“, рече финансискиот директор Лука Мучиќ.
Новиот оптимизам на „SAP“ се рефлектира во целогодишната прогноза за крајот на 2022-ра година. Групацијата очекува приходите од облачните услуги да растат на годишна основа од 9,42 милијарди евра на 11,85 милијарди евра. Прилагодено за валутни ефекти, растот ќе достигне 26%.
Приходите од облачни услуги и софтвер се очекува да бидат помеѓу 25 и 25,5 милијарди евра во истиот период, што е еквивалентно на само 5% до 6% без валутни ефекти. Сепак, инвестициите во облакот оставаат отпечаток на оперативниот профит: оваа бројка се очекува да биде помеѓу 7,8 милијарди евра и 8,25 милијарди евра, со што во најдобар случај ќе остане стагнација во споредба со претходната година или дури и да се намали за 5%.
За „SAP“, развојот на облак бизнисот е од суштинско значење. Клиентите се свртуваат кон решенијата за облак бидејќи тие се пофлексибилни, обезбедуваат поголема безбедност и можат побрзо да се прилагодат на потребите на компанијата. Речиси е неизбежно во исто време да се намали бизнисот со софтверски лиценци и поддршка.
