Тесла повлекува близу половина милион електрични автомобили

Тесла ќе повлече повеќе од 475.000 електрични автомобили од типовите „model 3“ и „model s“ поради проблеми со багажникот и камерата која ја снима околината зад возилото, што го зголемува ризикот од судари, објави Американската агенција за безбедност во сообраќајот.

Американскиот производител повлекува од пазарот 356.309 примероци од „model 3“ направени од 2017 до 2020 година поради проблеми со камерата и 119.009 примероци од „model s“ поради неисправен преден капак на багажникот.

„Недостапноста на дисплејот на задната камера може да влијае на задниот поглед на возачот и да го зголеми ризикот од судир“, се вели во соопштението.

На „Тесла“ не им е познато дали поради овие проблеми дошло до судир или дека има повредени или загинати.

Вредноста на акциите на „Тесла“ падна за 1,1 отсто.