„Mozilla“ ги објави деталите за првите смартфони кои ќе работат со „Firefox“ оперативен систем.
Уредите ќе ги произведува малата шпанска компанија „Geeksphone“. Платформата е базирана на „HTML5“ програмски јазик и наводно им нуди на креаторите на софтвери повеќе „слобода“ од другите.
Меѓутоа, ќе се соочи со жестока конкуренција во системите кои наскоро пристигнуваат: „Blackberry 10“, „Ubuntu“, „Tiyen“ и „Sailfish“, до крајот на 2013, исто така, ќе ги претстават своите смартфони, приклучувајќи се на пазарот кој веќе го окупираа „Android“, „iOS“, „Windows Phone“, „Blackberry7“ и „Symbian“, меѓу останатите. Аналитичарите сметаат дека нема премногу простор сите да преживеат.
Двата нови модели ќе се викаат „Keon“ и „Peak“.
„Keon“ е базичен модел, со екран од 3,5 инчи, камера од 3МП и „Qualcomm Snapdragon S1“ процесор.
„Peak“ има поголем екран од 4,3 инчи, камера од 8МП и посилен „Snapdragon S4“. „Mozilla“ објави дека телефоните ќе бидат на пазарот од следниот месец, но не по секоја цена. Нагласено е само дека телефоните ќе бидат поевтини од многу други алтернативи.
„Mozilla Foundation“ веќе користи „Firefox“ за својот софтвер, кој функционира како „open source“ проект. Ист принцип на достапност ќе биде применет и на оперативниот систем за телефоните, а „Mozilla“ го истакнува фактот дека, програмерите ќе можат да ги рекламираат своите апликации преку сопствени сајтови или други продавници.
Едноставната природа на системот значи дека апликациите можат лесно да работат и да штедат батерија.
Меѓутоа, еден аналитичар се запраша, дали ќе биде тоа доволно да го направи „Firefox OS“ успешен, бидејќи овие погодности ги нудат и други.
-„Firefox“ се обидува од веб да направи продавница за апликации и отвореноста на вебот да ја внесе во телефоните, вели Ник Дилон, аналитичар во консултантската фирма „Ovum“.
„Но прашање е што тие нудат подобро од еден евтин „Android“ телефон? На „Android“ имате инсталирани „Google“ сервиси и 700.000 апликации, а тоа „Firefox OS“ нема да го има“.
Ако пак, „Firefox OS“ се покаже како успешен, тој би го поттикнал создавањето на „HTML5“ апликациите, кои, по природа, би требало да работат на било кој смартфон и така значајно да им ја олеснуваат работата на програмерите.
Меѓутоа, многумина го гледаат овој јазик како недовршен, кога станува збор за мобилните телефони и веруваат дека, засега, апликациите кодирани за одредена платформа имаат свои предности.
