ФИФА сака да отстрани две ѕвездички од грбот на Уругвај

Пума, спонзорите на уругвајската фудбалска репрезентација, со допис до Уругвајската фудбалска асоцијација (АУФ) откри дека ФИФА им наложила да отстранат две од четирите ѕвездички над уругвајскиот грб пред Светското првенство во 2022, предизвикувајќи бура од реакции во оваа мала јужноамериканска земја.

Уругвај во историјата има освоено две светски првенства во 1930 и во 1950 година, но тие ги сметаат и победите на Олимпијадите во Париз во 1924 и во Амстердам во 1928, кои тогаш беа сметани како светски шампионати.

„ФИФА секогаш, дури и јавно, признаваше дека Уругвај има четири светски титули, бидејќи во 1924 и 1928 година, олимпискиот фудбалски турнир беше организиран од ФИФА, и дури во 1930 година решија да направат независен шампионат. Ние сме подготвени за разговор, но не и за поништување на нашата историја“, изјави потпретседателот на АУФ, Гастон Теалди.