Германската „Deutsche Telekom AG“ ја продава својата подружница „T-Mobile Netherlands BV“, која може да се процени на околу 4,5 милијарди евра, објави „Bloomberg“, повикувајќи се на извори запознаени со дискусиите.
Телекомуникацискиот оператор работи со „Morgan Stanley“ и и испрати информации за бизнисот до потенцијалните понудувачи. Компанијата побара понудите за првиот круг да бидат доставени овој месец, додаваат изворите, кои сакаат да останат анонимни додека официјално не бидат објавени информациите.
Продажбата на „T-Mobile Netherlands“ го привлече интересот на „Apax Partners“, „Apollo Global Management Inc.“, „BC Partners“, „Providence Equity Partners“ и „Warburg Pincus“. Разговорите за купување на единицата сѐ уште се во рана фаза и сè уште не е јасно кој од потенцијалните купувачи ќе влезе во првиот круг на аукцијата.
„Deutsche Telekom“ влезе во холандскиот пазар на мобилни телефони во 2000-та година, стекнувајќи удел во „Belgacom SA“ и „Tele Danmark“. Бизнисот беше преименуван во „T-Mobile Netherlands“ во 2003-та година, откако германската компанија ја купи целата компанија.
Во мај, „Deutsche Telekom“ ја зголеми прогнозата за профитот за 2021-ва година по силниот перформанс во САД и Европа во првиот квартал – профитот и приходите на групацијата ги надминаа очекувањата на пазарот.
„Ние го одржуваме моментумот и ја продолжуваме нашата успешна историја на раст“, рече главниот финансиски директор Кристијан Аилек.
По зголемувањето на прогнозата за американската единица „T-Mobile“, која веќе ги објави своите резултати, „Deutsche Telekom“ исто така ја зголеми прогнозата за нејзината добивка во Европа.
