Приходите од продажба на „Burberry Group“ останаа под нивото од 2019-та година и покрај кварталниот раст. Ова покажува дека британската марка заостанува зад некои од компаниите во секторот на луксузни стоки во однос на закрепнувањето од пандемијата. Цената на акциите на „Burberry“ падна повеќе од 10%.
Споредбената малопродажба за три месеци до март порасна за 32 проценти, соопшти компанијата. Ова се совпадна со нејзиното сопствено предвидување. Но, приходите се сè уште 5% пониски отколку во истиот квартал пред две години.
Приходите на конкурентите „LVMH“ и „Hermes International“ во истиот период успеаја да ги надминат нивоата во 2019-та година.
Податоците покажуваат дека „сè уште има работа“ за „Burberry“, вели Лука Солка, аналитичар од „Sanford C. Bernstein“. Компанијата го намали бројот на промоции во обид да го задржи својот имиџ како луксузен бренд кај потрошувачите.
Ова може да доведе до неповолни споредби на продажбата во споредба со претходните периоди за „Burberry“, една од првите компании за луксузни производи што ги намали финансиските прогнози минатата година кога Ковид-19 ги затвори продавниците. Модната куќа тогаш рече дека растот на оперативната маргина може да биде под влијание на поголеми деловни инвестиции и поголеми оперативни трошоци бидејќи компанијата се нормализира, но индикаторот ќе покаже раст во подоцнежна фаза.
Луксузните брендови повеќе се надеваат на Кина, каде што минатата година пандемијата беше многу бргу ограничена. Минатото лето, „Burberry“ отвори продавница со локалниот технолошки гигант „Tencent“ во Шенжен, комбинирајќи физичко и дигитално искуство. Споредбената продажба на продавници во азиско-пацифичкиот регион скокна 75% во четвртиот квартал, предводена од Кина и Јужна Кореја.
Но, брендот треба да се справи со затегнатите односи со властите во земјата, со оглед на повиците за бојкот на нејзината стока, поради коментарите што ги даде за памукот што доаѓа од Ксинџијанг во Кина. Сето ова доведе до раскинување на партнерството со „Tencent“, поврзано со игрите „Honor of Kinds“.
