И Златан сакал да биде вакцина „турист“ во Србија?

Шведската легенда на Милан, Златан Ибрахимовиќ сакал да прими вакцина против корона вирусот во Белград, како многу жители на Македонија и на околните земји, но Милан не му го дозволил тоа, тврди српскиот „Телеграф“.

Според нивните информации 39-годишниот Ибрахимовиќ се распрашувал кај тренерот на Црвена звезда и близок пријател, Дејан Станковиќ и работите биле договорени пред да интервенира италијанскиот клуб. Проблемот не бил во вакцината, туку во законите во Италија, во период кога на фудбалерите им било забрането да ја напуштаат оваа земја.

Ибрахимовиќ пред два месеци беше во Белград, каде што Милан играше токму со Ѕвезда во Лига Европа, каде што се случи еден мал инцидент и тој беше навредуван на национална основа. Звезда беше казнета за овој потег, но Ибрахимовиќ лобирал кај УЕФА да не се дава најстрога казна бидејќи се чувствувал добредојден во Србија.