Продажбата на конзолата „Nintendo Switch“ ја надмина продажбата на претходникот „3DS“. Компанијата објави дека се продадени 79,87 милиони единици од нејзиното лансирање во март 2017-та година.
Податоците ги следеа финансиските резултати на јапонската компанија, која прогласи рекорден профит од 3,6 милијарди долари за периодот април-декември. Аналитичарите го припишуваат успехот на „Switch“ на популарноста на „Animal Crossing“. Се очекува „Super Mario 3D World“ да обезбеди дополнителен поттик за овој успех веднаш штом ќе се појави на 12-ти февруари.
Побарувачката за конзолата порасна за 35,8%
„Nintendo“ го заврши производството на својата „3DS“ конзола во септември 2020-та година и соопшти дека продала 75,94 милиони единици за девет и пол години од нејзиното постоење. „Switch“ прв пат се најде во продажба во 2017-та година, а на него се придружи и поевтиниот модел „Switch Lite“ во текот на 2019-та година, кој исто така е вклучен во пребројувањето. Компанијата соопшти дека побарувачката за конзоли се зголемила за 35,8% во споредба со истиот период во минатата година, со вкупно продадени 24,1 милиони единици во последните девет месеци од 2020-та година.
Претседателот на „Nintendo“, Шунтаро Фурукава, рече дека компанијата има доволно компоненти за да продолжи со производство на уредите, и покрај големиот недостиг во индустријата и сега очекува продажба на 26,5 милиони конзоли во текот на фискалната година.
Ако некогаш ви била потребна, „Nintendo Switch“ е доказ дека не ви треба графика со највисока резолуција или најбрз процесор за да направите одлични игри. Понекогаш луѓето сакаат само слатко, релаксирачко искуство. „Animal Crossing“ отсекогаш бил најпродаваниот производ за конзолите на „Nintendo“, но „New Horizons“ ги надмина очекувањата, пренесувајќи околу 31 милиони продадени примероци. Компанијата очекува овој успех да продолжи и во 2021-ва година.
