Кога станува збор за замена на батеријата на електрични возила, тоа претставува потенцијално огромна цена за сопственикот на возилото.
Еден од најголемите стравови кои го имаат сопствениците на електрични автомобили е колку чини новата батерија што ги напојува. Во класичните возила со внатрешно согорување, кога зборуваме за батеријата, всушност зборуваме за акумулаторот, кој, дури и кога ќе се потроши, се менува релативно лесно и брзо без премногу висока цена.
Но, кај електричните возила, нивната најскапа компонента е самата голема батерија. Додека производителите на електрични возила нудат дарежливи гаранции за нивните автомобили за да помогнат во ублажување на тој страв, трошоците за замена на батеријата на тие возила надвор од тој гарантен рок брзо прераснуваат во ноќна мора.
Поконкретно, замена на батеријата кај Model 3 на Tesla чини 16.000 долари, пишува „Current Automotive“, повикувајќи се на сметка од „Тесла“ која тие ја објавија.
Тие посочуваат дека за повеќето електрични возила, гаранцијата за батеријата трае најмалку осум години или 160.000 милји, но исто така може многу работи да се случат со батеријата кои не се опфатени со гаранцијата. Гаранциите покриваат фабрички грешки или мани, но не и штета која сопственикот на возилото може да ја направи на батеријата, знаејќи или не знаејќи.
Сметката на која се повикува „Current Automotive“ е поврзана со „Model 3“ кој со своето подвозје погодил голем камен. Бидејќи батеријата на возилата на Тесла е на дното на автомобилот, ударот ја оштетил батеријата и повеќе не работела. Тој автомобил бил целосно мртов по пристигнувањето во сервисната станица на Тесла, а ударот во каменот се категоризира како штета предизвикана од „други надворешни сили“ и не спаѓа во гаранција.
Батериите на Тесла не се само една голема ќелија, туку се состојат од неколку модули, од кои секој има стотици ќелии на батерии. Ако едниот модул откаже, тоа всушност може да предизвика и другите модули да откажат.
Малку е бизарно што Тесла, на пример, под гаранција рачуна пожар на батеријата, дури и ако тоа било предизвикано од грешка на корисникот, но сопственикот на Модел 3, кој добил сметка од 16 000 американски долари за замена на батеријата, не предизвикал пожар на батеријата, што би било под гаранција.
Единствено решение за ова е да се земе најдобрата можна полиса за осигурување за возилото, која барем ќе покрие поголем дел од таквите трошоци.
